Өнегелі жанұя

Өнегелі жанұя
Хұсни ХАМЗА ЕРКІНҚЫЗЫ, Ата-әженің отбасындағы рөлі


Ата-әженің отбасындағы рөлі

Мақала авторы: Хұсни ХАМЗА ЕРКІНҚЫЗЫ
Жұмыс орны:
Лауазымы: Журналистика мамандығының 3-курс студенті
Жариялану мерзімі: 09.04.2016


Қазақ –  ұрпақ тәрбиесіне көп көңіл бөлген халық. Әке-шешемен қатар бала тәрбиесінде қарттардың-ата-әжелердің орны ерекше. Олар – өмірдің ащшысы мен тұщшысын көп көрген, өмірден түйгендері мол жандар. Ертеде ата мен әже отбасы институтының қызметін атқарды. Жас отау иелерінің отбасын берік құрып, шаңырақтарының шайқалмауына үлкен кісілер қолдарынан келгенін бәрін істейді. Жас шаңырақ сәбилі болғанда да, әке-шешемен қатар, ата-әжелер тәрбиесі де бірге жүреді. Әже ене болып, келін тәрбиелейді. Келіннің жаманын жасырып, жақсылығын асырады. Сондай-ақ, немерелерін ыстық құшақтарына алып, өнегелі, өсиетті сөздерін бойына сіңдіріп, ұрпағының тәрбиелі, саналы боп өсуіне үлестерін қосады.

Осы орайда, мен өз әжемді сағынышпен еске алғым келеді. Шіркін, ата-әжең бар болғанға не жетсін?! Менің үлкен азаматша боп қалыптасуыма әжемнің септігі көп болды. Отбасымда әжемнің рөлі үлкен болған. Қазақтың «атың бар­да жер та­ны желіп жүріп, атаң бар­да ел та­ны еріп жүріп» де­ген нақыл сөзі бар. Жанынан бір елі тастамай, ел аралатып, ағайынмен таныстыратын да, ертегі айтып, басымнан сипайтын да әжем болды. Басына түскен ауырлықты мойымай көтере білген, сонысымен бізге үлгі боп көрінген де осы әжем еді. Шаңырағымыздың ұйытқысы бола білген сыйлы әжемнің орнын енді анам жалғастыруда.

Мені қазіргі уақытта қазыналы қарттарымызды қаншалықты бағалап жүрміз деген сауал жиі мазалайды. Ықылым заманнан бері ата-әжелерімізді ардақтап келген ел едік. Алайда, жасында көп бейнет көріп, енді сол бейнеттің зейнетін көрер шақта қарияларды жетектеп, өз қолдарымен қарттар үйіне тапсырып жатқандарды да қоғамда кездестіріп жүрміз. Әйтеуір, түбі «атаңа не қылсаң, алдыңа сол келетіннің» кейіпін киіп жүрмесек болғаны.

Комментарии