Мамандығым мақтанышым

Мамандығым мақтанышым
Аманбекова Роза Алпысбаевна, Тәуелсіз елдің ұрпағын білімді ету – парызым


Тәуелсіз елдің ұрпағын білімді ету – парызым

Мақала авторы: Аманбекова Роза Алпысбаевна
Жұмыс орны: №72 мектеп-лицей
Лауазымы: бастауыш сынып мұғалімі
Жариялану мерзімі: 21.01.2017


Мен ұстаздық қызметімді еліміздің тәуелсіздік алғашқы жылдарынан бастадым. Іргесін енді ғана бекіте бастаған сол бір қиын кезеңнен бастап алдыма қойған ұстаздық мақсатым: тәуелсіз елдің тірегі болатын жігерлі де жалынды, ақылына алған білімі сай парасатты, жан-жақты білімді ұрпақ тәрбиелеу. Осы жолда жылдар бойы бар күш –жігерімді, білім-білігімді шыңдап жетілдіре түсудемін. Себебі бүгінгі ұрпақты дүниежүзілік білім, ақпарат, экономика кеңістігіне шығуға, қатаң бәсеке жағдайында өмір сүруге тәрбиелеушінің бірі ұстаз екені даусыз. Еліміздегі білім беру жүйесінің де мақсаты – бәсекеге қабілетті саналы ұрпақ дайындау. Сонықтан қазіргідей дүниежүзілік жаһандану кезеңінде мұғалім тек пәндік білім берумен шектеліп қалмауы керек деп ойлаймын. Әсіресе бастауыш сынып мұғалімі педагог болумен қатар, баланың мінез-құлқын танитын және оны түзететін психолог, өнердің барлық түрінен хабары бар шығармашылық иесі болуы керек. Білімнің алғашқы дәні балаға бастауыш сыныпта егіліп, болашақ өміріне ықпал ететіні белгілі. Осы кезеңде балаға ұжыммен тіл табысуды, өзі қатарлы балалармен достасып бірге жұмыс істеуді үйрету, әр түрлі үйірмелерге қатыстыру, мектеп өміріне бейімделуге бағыттау – мұғалімнің негізгі міндеті болып табылады.
Баланың өмірге деген көзқарасы, дүниетанымы, ұлттық болмысы, мінезі мен шығармашылық қабілеті, өнердің белгілі бір түріне бейімділігі бастауыш сыныпта қалыптасып, дамиды. Сондықтан бала өмірінің осындай жауапты кезеңінде бастауыш мектеп мұғалімінен аянбай тер төгіп еңбектенуді, шығармашылықты, ізденуді талап етеді. Оның үстіне елімізге келіп жатқан әр түрлі діни ағымдар мен сан түрлі ұлттардың жеңіл әуені, қорқынышты фильмдер мен ойындар, интернет арқылы тарап жатқан түрлі ақпараттардың жағымсыз әсері бүгінгі ұрпақтың болашағына қауіп төндіріп тұрғаны шындық. Осындай себептерден де қазіргі таңда мектеп мұғаліміне білім берумен қатар ұрпақ тәрбиесіне байланысты аса зор міндет жүктеліп отыр. Себебі жас ұрпақты дұрыс жолға бағыттайтын, жақсы мен жаманды айыруға үйрететін, ұлт алдындағы борышы мен міндетін айқындап сапалы ұрпақ болуға үндейтін де — ұлағатты ұстаз. Ол үшін мұғалім оқыту мен тәрбиелеудің жаңа әдіс-тәсілдерін меңгеріп, оны күнделікті сабақ барысында қолдана білуі қажет. Мен күнделікті іс-тәжірибемде инновациялық оқыту әдістері: блум таксономиясы, кейс әдісі, дамыта оқыту, сабақты ойын түрінде өткізу, интеграция т.б. тәсілдерді қолдана отырып оқушылардың пәнге деген қызығушылығын арттыруға, дүниетанымын қалыптастыруға, интеллектісін көтеруге ұмтыламын. Осы арқылы балалардың ойларын еркін жеткізе білуге, бір-бірімен достық қарым-қатынасын нығайтуға ықпал етемін деп ойлаймын.
Ұрпақты білімді етіп тәрбиелеу жолында әруақытта ізденіп, өз-өзімді дамытуға көңіл бөліп келемін. Өйткені, әрбір ұстаздың кәсіби шеберлігін арттыруы, әдіскерлік мәдениетін дамытуы – оның жұмысының сапасын анықтайтын көрсеткіш болып табылады. Мен өзімнің педагогикалық тәжірибемде оқушылардың шығармашылық дарынын, қабілетін бақылап, оны ары қарай дамытуға қолдау көрсетуді, дарынды балаларды аудан, облыс, республикалық, халықаралық деңгейде өтетін ғылыми жобалар мен пәндік сайыстарға, олимпиадаларға қатыстыруды қолға алып келемін. Осылайша оқушылардың білімін тереңдетуге, өзіне сенімді болуға, білім жолында тынбай ізденіп талапты және сапалы білім алуға деген қызығушылығын оятуды өзімнің парызым деп санаймын.
Жас ұрпақты тәрбиелеуде мектеп ұжымы мен мұғалімнің бөлінбес бір жүйе екені белгілі. Сондықтан мұғалім мектеп басшылығымен және басқа әріптестерімен сыйласып, ортақ тіл табысып, тәжірибе бөлісе отырып еңбек етсе, көп жетістіктерге қол жеткізетініне сенімдімін.
Менің педагогикалық әдіс-тәсілімнің бірі: кәсіби шеберлігімді әріптестеріммен бөлісу және жас педагогтардың өзін-өзі дамытуына көмектесу. Ол үшін әдістемелік, дидактикалық, психологиялық, техникалық құрал-жабдықтарды пайдалана отырып ашық сабақтар өткізу арқылы шеберлігімді бөлісіп, оның нәтижесін талдап, әріптестерімнің пікірін тыңдауды жөн деп санаймын. Әріптестерім жағынан айтылған сын-ескертпелерді дұрыс қабылдап, дер кезінде түзетуді де ұстаздық борышым деп есептеймін, Сондай-ақ, мектеп көлеміндегі біліммен, қоғамдық іс-шаралар өткізумен шектеліп қалмай педагогикалық, ғылыми-практикалық семинарларға, конференцияларға қатысып, білім жетілдіру курстарынан өтуді естен шығармаймын.
ХХІ ғасыр — білімділер ғасыры. Сондықтан бізге ой-өрісі жоғары Тәуелсіз еліміздің ертеңіне жауап бере алатын, жан-жақты дамыған, сапалы да саналы ұрпақ керек екенін естен шығармауымыз керек. «Ұстаздық еткен жалықпас,үйретуден балаға» деп хакім Абай атамыз айтқандай бүгінгі білім мен білік бәсекелес заманда ұрпағымыздың білімді болуына жаңашылдығымызбен, жан-жақты берген тәрбиеміз арқылы қол жеткіземіз. Ал, ұлт ертеңі болар ұрпақты тек қана білігі мен білімі, парасаты мен пайымы жарасқан, ой-санасы кемелденген ұлағатты ұстаз тәрбиелеп шығармақ.

Комментарии